Daniw===Isublim Kaniak Ti Kalman

Daniw ni Amado I. Yoro Isublim Kaniak Ti Kalman [Immuna a naisurat idi Mayo 4, 1992-Nasarakak daytoy iti maysa kadagiti marunrunot a folder kabayatan nga agdaldalusak iti pinullo a pempenko a karkarton iti storage---Nobiembre 30, 2012] Diak maliklikan dagitoy: alipaga ti iliw ti segga ti gagar. Ammuem dagitoy, Amme: adda uram a di masebseban ti nagbaetanta a taaw, mabalinak pay met a kunaen: "ay-ayatenka !" Dawatek dagitoy: isublim kaniak ti kalman, dagiti bara ti ayat ti pammateg [Ita la nga ammok a pasetnak pay la ta puusom]. Agkitatanto pay ngata? [duapulo ket dua a tawenen ti naglabas] Wen ! Urayem nga agsubliak ket pagraipenta ti ungto ti kalman. Arig layap ti lagipko simmalput iti ulep iti langit iti tangatang dinaliasatko law-ang ta kinatoam: Sika ! Nagpintasen ti manglagip iti lipat addaka manen kadagiti pikapik ti sursuratmo kayatko ti agsubli iti sabali a panagsubli. Denggem: Ay-ayatenka met !