DANIW PARA ITI MAIKA-41 NGA ANIBERSARIO TI KALLAYSA

Adtoy ti rimat ken darang ti rubi [para ken ni GCPY Enero 2, 2014 kuarenta y uno nga anibersario ti kallaysa] Amado I. Yoro Ewa, Hawaii ==================== Sagut ti Dios ti aldaw; ti rabii Dagiti malem ken agmatuon ti panagdaliasat Dagiti tawen ken baro a tawen Iti baro a biag Ken sabali a punganay ================== Diak inkari kenka ti paraiso Ngem adtoy: uppat a pulo ket maysa nga Enero a sinaruno ti Abril, ti Mayo ken Setiembre- .======================== Napnot'tarnaw; namsek iti biag Umang-anges; aggargaraw Kas iti kansion-samiweng Ti kinaagnanayon ti kararua ti berso, ti rima ken ken musika Kantaankanto latta Kas iti damo a panagdaton Ita, napaneknekamon ti kinapudno. ======================== Sagutko kenka ti ayat Ti sudi; Sagutko kenka ti pannakaawat Ti panaglupos dagiti aldaw A mangsurot ti dana ti biag Sagutko kenka ti isem ken katawa. ================== Siam pay nga Enero No ited ti Dios ti salun-at Iti pannagnata a magna A mangtunton Iti nagsaadan ti balitok Ti kallaysa ken pateg ti sakramento. ======================= Denggem: ay-ayatenka Ket sawekto latta iti Sudi ti kinaagnanayon Pannagnata uray iti dawel Iti salun-at; iti ragsak Iti ungto ti uged A kaikarianta ================== Ammom-ammok Uppat a pulo ket maysa nga Enero Ti nangtubay ti biagta Iti saem wenno katawa Dagiti pasidumri Kas iti atab ken ugot dalluyon iti taaw Iti pannakigasanggasat Uray iti kinamaymaysa ni Lei Esperanza A nangyeg iti dua a sagut Iti biag da CJ boy Ken iti isem ni baby Lia Iti garakgak ken inosente a katawa Iti danggay-duayya iti ubba Iti salinong daytoy a taeng. Sangariwriw man a baliksek ti ay-ayatenka: maysa laeng a kaipapanan ti inkarik idi aginnawatta iti altar. =======================================