NI MISTRO MULO KEN SIAK ITI 4TH NAKEM CONFERENCE NOBIEMBRE 11-14, 2009 UHM

NI MISTRO MULO KEN SIAK ITI HAWAII 4TH NAKEM CONFERENCE NOBIEMBRE 11-14, 2009, UNIVERSITY OF HAWAII MANOA


Ita a malem ti Nobiembre 11, 2009, iti Arts Building iti University of Hawaii, Manoa, nagkitakami manen ken no Mistro Mulo . [Romulo Gomez Basuel] gapu ta maysa manen kadagiti presentors wenno panelists iti 4th Nakem Conference a maangay ditoy Honolulu.

Manen, kunak ta ngamin, immay manen idi 1st Nakem Conference idi Nobiembre 2006, nairana kadagiti historikal a selebrasion ti sentenario dagiti Filipino. Maysaak kadagiti nagsarita daydi a 1st Conference, a kas met la ita a 4th ta binasak ti MANGMANGGED, maysa kadagiti ginasuten a daniwko. Naipablaak daytoy a daniw iti Bannawag, Pluma: Siit ken Rosas.

Sigud nga am-ammok ni Mistro Mulo. 4th year high school [1965-1966] ti nangrugian ti panagam-ammomi. Eksaminasion ti Pre-Military Training[PMT] [wenno CAT itan] 98 ti scoreko idinto a 97 kenkuana.

Idi agresulta, babaen ti desision da Maestro Ben Yaba, Maestro Laureano Agdeppa, Principal Salvador Anunciacion a nangbukel ti Hunta ti PMT, Saan la kano nga score examination ti nagbatayanda ngem mairaman iti 'katayag'. 5'2" kaniak, 5'7" ken ni Mulo.

Isu ti nagbalin a Battalion Commander idinto a siak ti Battalion Adjutant. No diak mariro, buklen ti Battalionmi kadaydi a tawen 1966 iti 5 Company ABCDE ket 3 a platoon ti sakupen ti maysa a company. Captain ti designation ti Company Commander idinto a 2nd Lt ti platoon commander
No saan nga agkibaltang ti memoriak aganay a 350 a lallaki manipud iti Sophomore, Junior ken Senior [2nd year, 3rd year ken 4th year].

Divine Word College of Laoag, Laoag City simrekanmi iti kolehio. Nasingedkami unay kas agkailian. Maymaysa ti bangami. No tarong ken marunggay ti adda, okey laeng. No rabong ken saluyot, okey latta met. No mailaw-an a sumangpet ti alawans, adda met igatang iti bangus ken balangeg. Nayon a kabanga ken katayabmi da Orlino Agdeppa, Elmer Ilmeng, diak malagipen ti dadduma. Napagasatankami a nagturpos iti kolehio. Double Bachelor iti AB-Liberal Arts, ken BSE ti inleppasna iti 1970. BSE-History kaniak, 1970. Daydi Senador Raul Manglapus, tubo ti Tagudin, Ilocos Sur ti Guest Speaker daydi a Baccalaureate Ceremonies idi Abril 1970.

Nagpa-Hawaiiak idi Hulio 30, 1971. Diak nalipatan ti ili ken ti Sinait National High School a nagturposak. Nadamagko laengen a maysa a faculty staff ni Mulo. Maysan nga adviser iti the Hillside Echo, warnakan ti eskuela a segun ti damagko, Tagalog, English laeng ti maaramat iti naguneg nga artikulo.

Gapu ta ammok ti panagayatna iti Ilokano Literature ken iti panagsuratan, insingasingko ti pannakairaman koma ti Ilokano section, ket maisurat ti daniw, ababa a sarita, salaysay ken damag. Kas pammabileg ti publikasion ken insitibo dagiti agsurat iti Iloko, inesponsorak ti "Journalism Award" babaen ti bassit a gatad ti kuarta. Naaramid a kasta, kas bungana, adda dagiti "nabukitkitan a siniglotan a talent ken sirib" dagiti agtutubo.

Tapno dakdakkel ti masakupan ken mabalin a maaranud iti Journalism Award, binaliwak ti naganna a kas "DAKILANG UGAT AWARD", saan laengen a dagiti agbasbasa iti Sinait National High School ti mabalin a makisalip, ketdi mairaman dagiti maibilang nga agdadamo a mannurat nga agindeg kadagiti sabali nga ili, probinsia. Napasamak a kasta aglalo a rimmang-ay ti Dakilang Ugat Award gapu ta ni Mulo idin ti presidente ti Gumil Sinait.

Maysa pay la ni Mulo a gagangay a classroom teacher/class adviser idi agbakasionak idi Hunio 1982 kas co-chairman iti Miss Gumil Hawaii Contest Committee ken agdamaak a bise presidente ti Gumil Hawaii, a kaduak da Mrs. Pacita Saludes a presidente ti Gumil Hawaii. Kinuyogmi ti grupo ni Maria Lina Pascua a kas Miss Gumil Hawaii.

Nakallalagip daydi a resepsion ti Municipal Government ken dagiti amin a kameng iti Association of Barangay Captains iti maikadua a kadsaaran iti Municipal building. Anian a rikna ti immapay ti kaunggak iti mabasak ti nakabaskag a dakkel a banner iti arko iti sango ti munisipio, kuna ti bando: Welcome Honorable Amado Yoro, Prisident, Oahu Filipino Community Council and Mrs. Pacita Saludes, Gumil Hawaii President, and Miss Maria Lina Pascua, Gumil Hawaii Queen.
[Sakbayna, sinangailinakami met ni Santa Maria Mayor Brillantes ken kakaduana idi 2nd floor iti Santa Maria Municipal Building. Nagdaguskami nga immuna iti Ilocos Sur Agricultural College, Santa Maria, sakbay a nagpa-Sinaitkami a mangituloy iti naisagana nga itineraries. Dakkel ti panagyamanmi ken ni Maestra Nenita Diga ken kakaduana iti ISAC. Sinangailinakami pay ti Gumil Abra]

Principal II ti rangkona [pasaray agakem a principal] idi nagbakasionak idi 1996 ken 1997. Daydi Mayo 1997 ti maysa a nakallalagip a panagkitami [manen]. Gapu ta siak idi ti Chairman iti Sinait Alumni Homecoming, nga isu met ti nangisangpetanmi iti aganay a 500 nga alumni [ken esposa/esposoda] a naggapu iti Hawaii, California, Canada, timmakder pay ti dutdotko iti makasalibukag a lagip idi siak ti nadutokan a mangipangato ti red, white and blue, the Philippine Flag, a kaduak ni mistro Eleazer Lived, iti imatang dagiti padak nga alumni, balikbayan, dagiti kakailiak, dagiti empleado ken turayen ti gobierno munisipal ken dagiti empleado iti eskuelaan.

Nakitak ti napasayaaten a plasa, ti dati a kataltalonan wenno patag iti baba ti pasdek a dati a nagpulpulikkaawak iti 'Battttttaaallllion" iti nagtakderak iti pangrangkisen, sa agmartsaak nga iggemko ti 'nagasat' a cadet saber of authority, no mapanak iti puon ti linia ti Company A.....
ket isilpok pay nga ipulikkaaw: Attteeeention. Present armmmmm.

Agsubliakto iti dati a nagtakderak, sanguek ti Battalion Commander [Romulo Basuel], unnatek ti kanawan a takiagko nga iggemna ti sable. Kunakto: Sir, All Accounted. Isungbatna met babaen iti sablena.

DAYTOY MISTRO MULO ita a nakadennak manen, nangaton ti nagaw-atna iti tay-ak ti edukasion. Nalpasnan ti Master degreena, ket no naawatak a nasayaat ti sinaona, tegteggedenna ti pananggun-odna iti Ph.D. Awanen iti Sinait National High School kas Principal II, wenno acting principal sagpaminsan. "Nupay addaak itan iti Central Office iti Vigan City, diak maliwayan ti mapan idiay Sinait. Kitkitaek a rumangpay koma daydi Gumil Sinait. Ammok nga addan nabuangay a New Sinait Writers Association ket sapay koma ta agballigikami a mangpasayaat para iti panagsuratan"

Sakbay nga intulodko iti tarusna a balay ti nasinged nga am-ammona iti Awamoku, Waipahu, Hawaii, nagkalugankami iti KIA Sedona a luganko kalpasan ti 4th Nakem Conference opening ita a Nobiembre 11, 2009, maysaak ngamin a nagibasa iti daniw.

Intarusko pay la ni Mulo iti balay ti maysa a kailianmi, dagiti Sarte family iti Waipahu, ta agur-uray dagiti dadduma nga estudiante idi iti high School idiay Sinait.

Naragsak manen daydi a panagsasarak.

Agaraup 11:45 ti agtengngan ti rabii ti Martes, idi itulodko ni Mulo. Maysa kadagiti kameng wenno presentors iti Panel 6: Reading and Re-Reading of Ilokano Text.

Iti biang iti DepEd Ilocos Sur, kadua ni Romulo Basuel da Estrella Soria, Salome Abero, Elsie Rigunan, ti topiko: Reviving the Ilokano Zarzuela.

[Note: Itoy a komperensia, naigasatak pay a naam-ammo iti personal ni Cristina Gallardo Gallato, first prize winner iti ETTI 1987 iti saritana a "Fr. Mike Comptroller",

Siguden nga am-ammok da Andres Malinnag, Jr. Ruperto Manuel, Alegria Visaya.

Diak maisurat amin ditoy dagiti adda iti listaan iti programa ta aduda met.]

=====000000=====