DATI A SENADOR ITI HAWAII RON MENOR KANDIDATO A PARA KONSEHAL ITI SIUDAD TI HONOLULU

Politika iti Hawaii 2012


EON MENOR PARA KONSEHAL ITI SIUDAD TI HONOLULU


Amado i. yoro

Dati a senador iti Hawaii ni Ron Menor ti nangiwaragawag ti panagkandidatona a para konsehal iti distrito 9 Central Oahu, Leeward Oahu, Mililani ken Ewa Beach, impakdaar ti warnakan.

Saan nga agdadamo ni Menor iti politika. Iti panagkunami iti bukodmi a panirigan, natenneb iti tay-ak ti serbisio publiko. No iti pannakipulapol iti komunidad a Filipino, saan met a lumned-tumpaw a kas dadduma. Adda a makidinnakulap ken makidanggay kadagiti fundraising, pasken ken parambak ni Filipino. Adda gundaway a kaduami idi a kameng iti hurado a nagpili iti Mrs. Hawaii Filipina, kasta met iti Miss Hawaii Filipina kadagiti panawen ni Bert Ugalino a presidente ti UFCH [1986-1988]

Idi nagkandidato a para US Congress idi 2006, isu met idi ti pannakaigamulomi iti kampania iti kalikagumtayo a no isu ti mapagasatan, isu ti umuna a Filipino nga agsaad iti dayta a puesto a pannakabagi ti Hawaii idiay US Congress, Washington, DC. Saanmi met a sinamir ti tiempo kas iti coffee hour ken sign waving. Idi addakami iti Labor Union Local 368, malaksid nga inendorso daytoy a union, adda met dagiti malem wenno agsapa nga addakami iti sign waving a kaduami dagiti dadduma a volunteers. Nupay naarus iti botos, saan a naupay ket itultuloyna latta iti agserbi.

Immuna a nagrepresentante idi 1982. Nagsenador iti Hawaii. Nasuroken a duapulo a tawen iti panagserbina iti agpada a Hawaii State House of Representatives ken Hawaii State Senate.

Nagpangulo iti nadumaduma a komite iti kaaddana iti Lehislatura ti Hawaii

Consumer Affairs, Chair
Energy and Environment, Chair
Health, Member
Ways and Means, Member


Anak ti nalatak nga Ilokano a tubo iti San Nicolas, Ilocos Norte, immuna a senador a Filipino iti Hawaii, nagkameng iti Hawaii Supreme Court Benjamin Menor. Maysa nga abogado.

Nayanak idiay Hilo, Hawaii a dati a nagnanaedan ti pamilia Menor, ngem gapu iti panagpaay ti amana kas umuna a Filipino a senador, immakarda ditoy Oahu.

Nagun-od ni Ron ti Bachelor of Arts in Political Science iti University of California, Los Angeles idi 1977, sa tinurposna ti Juris Doctor, Georgetown University Law School, Washington DC, 1980.

Tinegged ni Ron ti padasna kas Legislative Intern for Congressman Daniel Akaka, 1978; nagtrabaho iti Department of Attorney General, State Planning, Law Clerk, Chief Justice William Richardson, Hawaii Supreme Court, sa nagsanay kas pribado nga abogado.


Kameng iti nadumaduma a grupo sibiko, kas
Director, Mililani Crime Watch Program
President, Mililani High Advisory Council
Member, Mililani Lions Club
Board Member, Mililani Young Men's Christian Association
Legal Counsel, State Organization of Lions Clubs
Board Member, West Oahu Young Men's Christian Association.


Caucuses/Non-Legislative Committees:
Member, Mayor's Council of Law and Order.


Iti agdama, dua a Filipino ti kameng ti Honolulu City Council. Saanen a makapagtaray pay ti situtugaw iti distrito nuebe gapu iti term limit. Ita a masurat daytoy [Pebrero, 8] awan pay sabali a Filipino nga aspirante a mabalin a makasango ni Menor.