UMBI

Daniw para aldaw ti puso

Umbi

Amado I. Yoro
Ewa, Hawaii



Yumbik dagitoy: kinasudi ti ayat
sagutko kenka ita nga aldaw
adtoy ti balonko sangakopita a diro
arak ti rabii ti pammasangbay
Riknaek ti dungngo dayta pusom
No umayak ita saan a
Naliday a sallapingaw
Ngem naamo a kalapati
Ti ayat
Bay-am a simsimak nga umuna
Ti sardam; palludip iti apagdeppel
Agek-iliw; karayo Iti bibig ni ayat.
Ay-ayatenka: yumbi manen toy pusok
Bay-am nga ubbaenka nga isala
iti danggay ti samiweng sonata
Anem-em ti diro ti darikmat
Sirok ti bubongan-langit
Ayan-ayatta, adtoyak!
agkasingin a riknata
Bay-am a mabartekak iti rabii
Denggem-denggek naisangayan
A talukatik ket ammomton
Ti kaipapanan rinibu a kinaumel
Iti nagtengko a nagsapalan
Pasetnakon ti nabayag a panaguray
Adtoy beggang ti ayat !