KALAPATI ITI TANGKAL: WAYAWAYA

DANIW

KALAPATI ITI TANGKAL: WAYAWAYA
DANIW AMADO I. YORO
Ewa, Hawaii


Siripek ti sirarayray a raya ti init
Birokek ita ti wayawaya
Iti labes ti sirmata ruar uppat a suli
Ti lubong ti biag
Sirmataek ti langit
Salpoten ti nakem
Dagiti kalikagum
Ti panagbariw-as

[Pannakabalud met
ti awit a krus
uray dagiti sayamusom
ti sabong]

Kitikit ti bato
A lamisaan ti kopa ti ayat

Talna
Isublik ti apuy
Iti init
Ti beggang
Ti karayo

Agpakniak ita
Iti suli
Agtanamitimak
Kas iti meditasion
A mangibulos
Ti sennaay ken
kalikagum

Allingangek ita
Ti arasaas ni Salome Alegre
Naallumamay ti nota ken rima
Ti samiweng ni Cielo Alma

Ay-ayatenka
Yallangog ita
Ti kararuak

Ti wayawaya
Ti wagayway
Ti ayat
Ti sakripisio

Ti init agsubli
Ti linnaaw
Kadagiti kannag
Ti muyong

Dagiti agmulmula, naagawada
Nga agitukit ti bukel

Awitda ti sangasakruy nga ayat

Adda agar-arado iti talon
Mangitugkel ti agmulmula iti bukel
Ti daga a binisibisan ti arbis
Ti agmatuon

Ti pammatik
Ti ramut dagiti punnuot
Ti kaipapanan ti panagbaniaga