Konseho Dagiti Nagpresidente ti Oahu Filipino Community Council, naangay
Amado I. Yoro

Pakauna:

Ti pannakainaw ti Council of Past President ket mabalin nagpadpadlaw kadagiti immuna a tawtawen.Mabalin a wen, wenno saan. Ngem mabalin nga itan, inted ti panawen a maikuyog ti panagbalbaliw ti aldaw iti pannakaangayna, a mabukelen.

Maibilang a marka ti historia ti Oahu Filipino Community Council [OFCC] ti Hunio 30, 2011, kas umuna a miting dagiti dati a presidente ti OFCC.
Lugar: Burger King/Dillingham.
Oras alas sais y media agingga iti alas otso y kuarenta y sinco.

Linuktan ni Danny Villaruz, indauluan ni Jenny Quezon ti napasnek ababa a kararag. Naidawatan met dagiti saan a nakaatendar kasta met dagiti napanen iti sabali a biag iti patinayon a panaginanada.

Sakbayna, napakaammuan, nasuratan ken naiwarwaragawag ken nayaw-awis kadagiti asino man a nagpaay a presidente ti OFCC, daytoy a miting tapno itiponda dagiti napateg a padas ken pampanunot no kasano ti papigsaen ti OFCC para kadagiti masungad nga aldaw ken tawen iti masanguanan dagiti Filipino iti Hawaii aglalo iti dumakdakkel ken dumurdur-as a populasion Filipino.

Dagiti namunganay iti miting a naangay iti Burger King/Dillingham Plaza nga ipanguluan ni Danny Villaruz [2009-2010], kaduana da Jun Abinsay[1994-1996], Franklin Borromeo[2007-2008], Ben Cabreros[1997-1999], Gerry Rojo[1984-1986], Jenny Quezon[2003-2004] ken Amado Yoro[1982].

Sagudayen ti Resolusion 2011-5A, ad-adda a maawagan iti Council of Past Presidents [COPP} iti Oahu Filipino Community Council iti sakup ti Artikulo VII, komitiba, Seksion 1, Standing Committee, kas naidatag ken naanamongan idi Hunio 12 a panagkombension ti OFCC nga inantendaran iti aganay a 133 a delegado: “Council of Past Presidents shall comprise of all surviving past presidents of the Council and shall act as an advisory to the president and board of directors. The Immediate Past President shall serve as Chairperson”

Babaen iti mosion toy nagsurat iti pannakairugi ti umuna a miting ti COPP a sinigundaran ni Gerry Rojo, buklen ti saan a nakurkurang ngem lima a pangrugian ti Council of Past Presidents [COPP].

Mabalin met latta a tumipon dagiti saan a nakadar-ay kadagiti sumaruno a miting a maangay iti kada tallo a bulan, makalawas sakbay nga agmiting ti OFCC board dayta a quarter month.

Babaen iti mosion ni Franklin Borromeo ken sinigundaran ni Jenny Quezon, nga agpaay a Recorder ni Jean Jeremiah para iti COPP, agdama a direktor ti OFCC.

Sinarita tunggal immatendar dagiti personal a padasda kas nagsaad iti dayta a puesto, no ania dagiti karitda, dagiti paliiwda idi ken ita ken dagiti singasing a mabalin a makatulong iti agdama.

Napagkaykaysaan a sisasagana ti COPP a mangsuporta ti administrasion tapno malaksid la dumur-as ti OFCC iti man membership kas mangpabileg ti panagtitinnulong, mapasayaat pay iti pannakaipagna ken pannakaipatungpal dagiti proyekto a pagsayaatan ti OFCC kas nagkaykaysa a grupo Filipino iti Oahu.

Maikkan koma ti importansia kadagiti masnop a proyekto dagiti unit organizations babaen iti insentibo no kasta nga adda dagiti proyekto a makatulong a mangpadur-as iti ili, eskuela, ken komunidad dagiti naggappuanda nga ili, probinsia wenno rehion.Agbalin koma ti OFCC a patinayon a pagtuladan iti nasayaat a pannakaipataray iti produktibo a liderato.

Ti liderato a mapagtuladan: dumngeg, makiinnadal, nawaya a panagsarita ti kayat nga ibaga a mabalin a mangpasayaat ti aramid. Boluntario ti amin a panagserbi. Pinnarbengan iti respetado a diskusion. Awanan ego. Awanan iti “I” ngem “WE”. Komitado a panagserbi, ipatungpal nga akem iti aksion.Maawis a tumipon dagiti dati a presidente ti OFCC iti quarterly meeting. Agreport ti Chairperson ti COPP iti OFCC board meeting.

Dagiti pasado a presidente ti OFCC nanipud nabangon ti OFCC 1959 [pimmusayen dagiti dadduma]: Justo Dela Cruz, Adelino Valentin, Disodado Avecilla, Jesus Cayaban, Marcelino Avecilla, Gelacio Daoang, Moises Claveria, Pedro Oducayen, Emilio Alcon, Victor Agmata, Bart Alcaraz, Pol Ragasa, Gene Albano, Pete Racelis, Jr., Mel Europa, Mel Agag, Jr., Ilalo Parayno, Fred Aspree, Matilda Molina, Ricardo Labez, Mario Albalos, Amado Yoro, Nunelon Medallon, Victor Guillermo, Gerry Rojo, Don Alvarez, Maggie Domingo, Romualdo Agustin, Marlene Manzano, Jun Abinsay, Ernie Pascua, Ben Cabreros, Edith Pascua, Eddie Agas, Sr., Jenny Quezon, Arnold Villafuerte, Lynne Gutierrez, Franklin Borromeo, Cirvalina Longboy, Danny Villaruz

.=====00000======
Agdama a presidente ti OFCC ni Maria A.F. Etrata, kaduana da Fe Edita Velasco, 1vp; Leo Gozar, 2vp, Edna Alikpala, sekretaria, Faye Cudal, asst secretary, Liza Romualdo, tesorera, Gladys Menor, asst treasurer, William Cudal, auditor. Direktor da: Baybee Hufana Ablan, Amelia Cabatu, Alma Caberto, Maggie Domingo, Edit Gudoy, Jean Jeremiah, Ilalo Parayno, Larry Ramirez

====0000000=====
MISS HAWAII FILIPINA 2011 PAGEANT, MAANGAY ITI EMPRESS RESTAURANT, HONOLULU, HAWAII INTONO HULIO 30

TALLO dagiti kandidata manipud kadagiti masnop nga isla nga ibagianda ti mangnamnama nga awitenda ti korona a Miss Hawaii Filipina 2011-2012.

Babaen ti panangiturong ti Oahu Filipino Community Council [OFCC] ken danggayan ti United Filipino Council of Hawaii [UFCH], manamnama a balligi ti ibunga daytoy a koronasion kas iturong ti Ways & Means ken Fiesta Committee ti OFCC.

Dagiti agsasalip
Miss Oahu Leoneoi Mabiog
Miss Maui Shelby Bantilan
Miss Kauai Topaz Marley Fernandez

Maangay ti pabuya ken koronasion iti Empress Restaurant Hulio 30, 2011 ket adda maangay a pangrabii iti $35.00 a donasion.