KEN GRACIA CAMPOS: KAYAW*
Amado I. Yoro
itukitko manen: bay-am
nga agrusing ti bukel
birtud ti balikas
ni Ilokano -
nadam-eg ti muging, bay-am
nga agbukar sadiwa
birtud ken balor ti kultura
ni Samtoy -
denggem: dagiti samiweng
dagiti saning-i
dagiti katawa
dagiti unnoy
ti guyugoy ti iliw
ti pakabuklan ti ayat
ammuem: kanayon a mayasidegak
iti Pikkan ken Caillayan
dagiti nagbukaran ti kinaagtutubo
naisem latta ti talon
ket daydi ibit ti parbangon
daniwdan a naitalimeng
iti barukong ti langit
yuritko manen, bay-am
a rangtayan ti Tapao-Quibit-quibit
ti nasangal a pammateg
adtoy ti bukel ti ayat !
*Bannawag Pebrero 10, 1997
Subscribe to:
Post Comments (Atom)
No comments:
Post a Comment