TALDIAP TI ILOCOS SURIAN MEDICAL MISSION AND HOMECOMING

Tapno Ipuontayo nga Irugi No Kasano a Nainaw ti ISAH Medical Mission & Homecoming

Amado I. Yoro

Ita a Disiembre 17-22, 2011, angayen manen ti ISAH Medical Mission iti ili ti Santiago, Sinait, Cabugao ken Santa. Idauluan da Dr. Charlie Yadao Sonido, Mission Chair, ken Danny Villaruz, ISAH president, ken dagiti aganay a tallopulo a volunteers. Tunggal dua a tawen iti bulan ti Disiembre nga isayangkat ti ISAH daytoy a proyekto, nangrugi idi 2005, 2007, 2009.

Taldiap:

Ibatayko iti personal a padas ken pannakailaga ti biagko kas maysa kadagiti duapulo ket dua nga organizers iti Ilocos Surian Association of Hawaii sipud nabuangay idi Pebrero 27, 1977 iti pagtaengan da agassawa a Fred ken Pacita Saludes iti Wanaka St., Salt Lake.

Adu a pasamak ken nabunga a proyekto ti ISAH kadagiti nagsisinnublat a liderato a nangrugi ken ni Atty. Peter Aduja. John Quiocho, Mario Albalos, Sid Villafuerte, Peping Billena, Rey Custodio, Ben Cabreros, Julio Quiocho, Jr.

Ket idi Nobiembre 2001, nabotosan nga interino ni Danny Villaruz, i-Santa, ket manen, nabotosan a kas naan-anay a presidente a nagsapata idi Pebrero 22, 2002, nagbukar ti ISAH a kas nalangto a kayo a nangted ti ad-adu pay a bunga ken pakairanudan dagiti kameng, kasta iti komunidad ken ti probinsia a naggapuan.

Itoy a panangsurotko ti namunganayan ti ISAH Medical Mission and Homecoming iti bukodko a padas ken pannakilinnangen, kayatko la nga ilanad ti pudno a naglasatan a tugot, ti urat, ti dalan ken ti nakasubokanna iti ima, panunot ken panangisakad ti nagkakayammet a kameng. Awan ti panggepko a mangala ti ania man a kredito, ammok met bassit ti rugi daytoy segun iti pannakairamanko iti maysa kadagiti miting iti kaadda ditoy nga agbisbisita ni Ilocos Sur Vice Governor DV Savellano idi Hunio 2005.

Nabatad iti inlanadko iti personal activity journalko a binuniagak iti Scenario V. Da Homecoming Mission.

Hunio 5, 2005, Banyan Tree Room, Hale Koa Hotel. Planning Committee ti naawagan iti BISITA 2005 [Balik Ilocos Sur International Tourism and Cultural Advancement] babaen iti Ilocos Surian Association of Hawaii a buklen dagitoy sumaganad:

Dr. Charlie Sonido, Rep. Jun Abinsay, Dr. Elizabeth Abinsay, Ted Saribay, Danny Villaruz, Emmy Villaruz, Engineer Carlito Soria, Mrs. Emilita Soria, Mrs. Ilocos Surian Nancy Clemente, Dennis Luat, Al Sabangan, Rose Sabangan, Amado Yoro, dayta a pangaldaw ti nasao a grupo, a sangaili ni DV Savellano iti Ilocos Sur.

Nadakamat ket nailanad dagiti kangrunaan a bugas, panggep ken sakupen ti Ilocos Sur Homecoming & Medical Mission dagitoy

· Educational
· Spelling Bee
· Math Match, Science ken History
· Medical
· Emergency Services Response truck
· Hospital beddings
· Cultural and Arts
· Ilocos Sur Idol,
· Sports

Ilocos Surian Medical Homecoming Mission ti December 16-23, 2005. Sakbayna, indatag ni Dr. Charlie Sonido iti miting ti hunta direktiba daytoy a panggep. Opisial a naanamongan ket nadutokan a kas pangulo ti mission a kaduaen da Dr. Elizabeth Abinsay ken Jun Abinsay.

Kas presidente ti grupo, indauluan ni Danny Villaruz ken Mrs. Emmie Villaruz kaduana da Dr. Charlie Y. Sonido ken Dr. Elizabeth Abinsay, chair ken co-chair ken Representante Jun Abinsay, iti kangrunaan a nangsuporta ken kimmuyog pay. Naikuyog met dagiti dadduma nga opisial ken kameng, pakairamanan da Dr. Estrella Taong, agassawa a Franco ken Cleo Bala Casino, Ted Saribay agraman dagiti sumagmamano a volunteers. Adda naisagana a Bucanegan [Sadino ti Piliem a Pagretiruan: Filipinas wenno Hawaii] a sinurat ni Amado Yoro. Ni JP Orias ti nagpaay nga over-all Coordinator dagiti aktibidad idiay Ilokos.

Kinuna ti ISAH: Share what you have. Adda nasurok a duagasut [200] nga indonar ti Hale Nani Rehab & Nursing Center. Inggannuat ti ISAH ti maysa a fundraising tapno maur-or ti tulong kadagiti nabiktima ti Typhoon Feria idiay Ilokos kas napakaruan iti dayta a kalamidad. Dadduma a fundraising ti inangay ti ISAH tapno makitinnulong laeng a mangpataud ti pondo para kadagiti naapektaran: kas iti Katrina, Ondoy, Pepeng ken dadduma. Theme: “Working Together to Rebuild Communities Here and Our Homeland” .

Adda dagiti opisial ken kameng ti ISAH a nangted ti boluntario a panawenda a nagurnos ken nagisagana kadagitoy nga hospital bed tapno maipatulodda idiay Ilokos babaen iti dadakkel a shipping containers: Art Abinsay, Jun Abinsay, Carlito Soria, Amado Yoro, Al Sabangan, Danny Villaruz, Baltazar Villaruz, dadduma

Iti maikadua a daras, dagitoy man met laengen a volunteers ti napan nagurnos ken nagisagana iti pannakaipatulod dagiti aganay a tallopulo a wheel chair nga indonar met la ti Hale Nani Rehab & Nursing Center.

Naulit ti sabali a biahe idi Disiembre 16-23, 2007 Ilocos Surian Medical Mission iti Vigan, Santa, Cabugao, Santiago, Bacarra, Pasuquin, Galimuyod. Da Dr. Charlie Sonido, Dr. Elizabeth Abinsay, Jun Abinsay, Dr. Arnold Villafuerte, M/M Renato ken Maria Etrata ken dadduma pay ti kimmuyog a kaduada dagiti adu a volunteers.

Inarak manen ti media dayta a mission ket nasayaat iti pannakairakurakna iti sapasap a Kailokuan.

Naisaruno ti Disiembre 2009 ket napan ti mission iti Sinait, Cabugao, Vigan, Santa, Pasuquin, Quezon, Paranaque, Santiago nga indauluan manen da Dr. Charlie Sonido, Dr. Elizabeth Abinsay, Jun Abinsay, Dr. Arnold Villafuerte, M/M Renato ken Maria Etrata ken dadduma pay ti kimmuyog a kaduada dagiti adu a volunteers.

=====0000=====
DAGITI PRESIDENT ELPIDIO QUIRINO AWARDEES 2011

Dr. Charlie Yadao Sonido
Mr. Felipe Palma Abinsay, Jr.



Apay nga isuda laeng? Apay a saan ni kasdiay, ni kastoy wenno siak? Natural a rumsua ti saludsod banag a taudan ti ilem wenno pammabalaw iti gunglo wenno komite.

Apay nga adda daytoy a pammadayaw?
“An award of distinction, prestigious and eminent, ought to be thought of to recognize the extraordinary work of those who come from Ilocos Sur, and who have called Hawaii their home,” kinuna ni Danny Villaruz, presidente ti ISAH.

Wen, kuna met dagiti kameng ti hunta direktiba.

Kasanoda a napili

Isuda a nangidaulo ken nangyuna ti naimpusuan a mission.
Dr. Sonido, chaired the the medical mission since 2005, with Dr. Elizabeth L. Abinsay anad Rep. Jun Abinsay co-chairs. ISAH had three medical missions in 2005, 2007, and 2009 in Ilocos Norte, Ilocos Sur, and Quezon.

Adda pay programa nga Ilocos Sur Idol, GILAS, Bukanegan, General Math, Social Studies ken dadduma a pakawatwatan ti sirib.

Asino ni Presidente Quirino, ken apay nga isu ti napili a mainagan iti Award? Ania dagiti galad a mapagtuladan ken mapagtamdan.

Immuna nga Ilokano a nagpresidente iti Filipinas. Anak ti Vigan, ken Caoayan. Dimmakkel iti Aringay, La Union nga ili ti inana. Nalpasna iti abogasia iti Unibersidad ti Filipinas. Maestro pay. Orador. Daulo dagiti grupona a dumidebate, pintor, nagdelegado iti kombension konstitusional, estadista ken mangilinlinteg.

Kuna ti Wikepedia, : “In 1934, Quirino joined the Philippine Independence Mission to Washington, D. C. The mission, headed by Manuel Luis Quezon, secured the passage of the Tydings-McDuffie Act that set the date for Philippine independence by 1945. The independence of the Philippines from the United States was declared on July 4, 1946.

“Nagsayaaten ti napanunot ti ISAH iti kastoy a proyekto,” kinuna ni Jerry Ilar, iti Jerry Ilar Realty. “Rumbeng unay nga itandadudotayo met ti bukod a patanor ti probinsia ken ti ili a naggapuan. Daratayo ti darana nga agtartaray iti uratna. Ket kadagiti mapadayawan, rebbengna unay gapu kadagiti ammotayo nga aramid ken serbisioda iti komunidad,” innayon ni Jerry.

“Nadagdagsen latta ti dara iti pada nga Ilokano,” suportaak daytoy a programa,” kinuna ni Lito Alcantra iti Group Builders. “Dayaw ni Ilokano, dayawtayo amin.”

Makapasalibukag dagiti komento a positibo. Makapatibker rikna dagiti komento dagiti agpangadua. Ngem iti kastoy a banag, agbalin amin a komento a mangtimbang ti nasaysayaat a panangipagna ti programa.

Pangayeden ti programa nga imatonan ni Larry Ordonez.
KEYNOTE SPEAKER ni LT GOVERNOR BRIAN SCHATZ

Mangablaaw met da

Consul General Leoncio Cardenas
Cabugao Mayor Edgardo Cobangbang


Kadagiti amin nga Sponsors, Advertisers ken supporter, agyamankami


“Aggapu Iti Puso” or Mula sa Puso [From the Heart], kayatna a sawen pannangted, panangisagut iti ayat ken mangtubay ti baro a henerasion ta itedtayo ti tulong iti sabali ken iti komunidad a paggarawantayo.

Kas yaaddang ti dur-as ken mangidalan ti aramid, pasungadentayo ti Pebrero 27, 2012 a kasangay ti ISAH iti maikatallopulo ket lima nga anibersariona kas nagtitinnulongan a binuangay dagiti duapulo ket dua a lider a naggapu iti nadumaduma nga ili ti probinsia ti Ilocos Sur idi Pebrero 27, 1977. Daytanto manen a maipatugaw dagiti baro nga opisial.

Iti agdama, adda ti ISAH iti natalged nga ima dagiti liderna. Adu dagiti nasayaat a proyekto. Maysa kadagiti kaaktibuan a kameng ti OFCC .

Daytoy a tawen, maysa manen a paset ti pakasaritaanna ti pannakaiwaragawag ti nabuangay a President Elpidio Quirino Award nga agbalinto a tinawen a proyektona tapno ituloy a padayawan kas pammigbig kadagiti naindaklan a liderna..

Manipud iti puso ti sibubukel nga ISAH: “Agyamankami iti komunidad iti awan sardayna a suporta ken pannakidanggayna iti nadayaw a panggep ti ISAH”.