LIA

LIA
[Angelia Campos Paguirigan Yoro Balcita: Enero 1, 2012]


Simmangpetka a sagut ti umuna nga aldaw
Ti panagdaliasat, kaduaka a mangsurot ti dana
Ti pannakigasanggasat da kabsatmo a CJ Boy,
ni Maria Caridad nga inam
Ken ni Abraham nga amam

Sinungbatam ti gumaygayebgeb a pammasungad
Ken panaguray iti dumaldalinesnes a segga
Iti isasangpetmo iti nakurapay ngem natalimeng
A taeng a binuniagak idin iti paraiso
A sinangpetan ti inam.
Ditoy met la a taeng, iti isu met la a laem
Ti nakanggak iti ibit ti maladaga a namalugatan
Ti inam
Ipalubosmo ngarud nga ubbaennaka ni Mama Oyya
Iti takiagna rinaem ti dungngo a kas dungngona iti inam
Sagutnaka ni Apo Dios iti isasangbaymo
Kantaankanto iti duayya ni ayat
Ragsak, kappia, talna,
Bay-am a mapusek ti taeng iti ibit
Ti katawa, ti garakgak a ray-aw ti taeng
Lemmesendanto ti liday
Ti kaaddam, isu ti ragsakmi
Iti naunday a panagpasungad
Ket datayo amin ti magna
Iti nawatiwat a panagdaliasat
Iti birbirokentayo a kaibatogan.