MAIKA TALLOPULO KET LIMA A TAWEN TI ILOCOS SURIAN ASSOCIATION OF HAWAII

TALDIAP TI ILOCOS SURIAN ASSOCIATION OF HAWAII [ISAH] TI MAIKATALLOPULO KET LIMA NGA ANIBERSARIONA

Amado I. Yoro

Apagisu a tallopulo ket lima a tawen ti Ilocos Surian Association of Hawaii ita a Pebrero 2012.

Nabangon idi Pebrero 27, 1977 babaen iti 22 a tattao a nangibagi iti nadumaduma nga ili iti Ilocos Sur kas kada Manuel Cabacungan, Fred Saludes, Pacita Saludes, Amado Yoro, Sinait; Francisco Ugale, Bert Ugalino, Mike Ulibas, Francisco Ponce. Magsingal; Leon Flores, Sta Catalina; John Quiocho, Elvin Quiocho, Julio Quiocho, Jr., Caoayan; Peter Aduja, Felipe Abinsay, Jr., Mario Albalos, Vigan; Ernie Cardenas, Santa; Macario Manzano, Narvacan; Art Perez, Sta Maria; Johnny Villanueva, Candon; Mel Europa, Annie Lugmao, Sonia Lugmao, San Esteban.

Dagiti immuna nga opisiales a pinagsapata ni Consul Purisimo de Peralta idi Marso 27, 1977 idiay Holiday Inn-Airport da: Atty. Peter Aduja, presidente; Mel Europa, umuna a bise; Pacita Saludes, maikadua a bise; Annie Lugmao, sekretaria; Francisco Ugale, tesorero; Mario Albalos, katulongan a tesorero; Amado Yoro, auditor; Mike Ulibas, manarawidwid; Ernie Cardenas, Bert Ugalino, Francisco Ponce, public relations officers; Elvin Quiocho, Jun Abinsay, Johnny Villanueva, sarhento de armas. John Quiocho, mamagbaga.

Ania ti signipikante ti selebrasion ti ISAH itoy a Pebrero 2012?

Saan a makideman dagiti dua a matami ti kinapateg ti Pebrero 27, 1977. Nasiputanmi, wenno naikuyogkami ti panagdaliasat ti ISAH kadagiti agingga kadagitoy nga aldaw. Imbunga dagiti adu a nagtitipon a pampanunot ken gandat ti pannakaitaray ken pannakaitag-ay ti kinaasino ti ISAH. Saan a mailibak, adda met dagiti dalluyon, ti ugot ken atab, ngem gapu kadagiti agtitinnulong nga ima, ulo ken kakuykuyog ti kuarta, nupay saan amin a gannuat ket balligi, ngem adu dagiti balligina a taliawen ken bigbigen itoy nga anibersariona.

Nagsisnnublatan dagiti presidente ti pannakatipon ti ISAH. Adda bukod nga estilo, wagas ken panangiturong tunggal maysa. Ni Danny Villaruz, tubo ti Rancho, Santa, Ilocos Sur ti agdama apresidente.

Sakbay a nagpresidente ni Villaruz, bigbigentayo dagiti adu a proyekto nga inyusuat ken inaramid ti ISAH.

Pakontes ti Miss Ilocos Surian; Cultural presentation, Sports Festival, pannakaaramid ti opisial a logo, pannakaikamengna iti OFCC/UFCH, kdpy.

Umuna a Miss Ilocos Surian ni Deborah Obrero, simmaruno da Carol Cortes, Alma Alonzo, Florence Cabrera, Ann Cabreros.

Saan a panangbagkat ti bukod nga ubet, maysa ti ISAH kadagiti kaaktibuan a gunglo iti komunidad ita aglalo kadagitoy las-ud ti sangapulon a tawen nga idauluan ni Danny Villaruz. Maysa daytoy a gunglo a nakipagbangonan toy nagsurat sipud simmangpet iti Hawaii idi Hulio 1971. Naisigud iti komunidad kas iti Sinaitenians of Oahu ken ti Gumil Hawaii.

Taldiapantayo ti agdama a komunidad. Kasla tay kunak a panagmumula iti saluyot tapno adda dagiti marka ti kaadda ni Ilokano iti Hawaii. Nakairuamantayo ti ‘tagnawa’ wenno ‘tinnulong’ tapno maitag-ay ti gannuat a mangidur-as ti kinaasinotayo a Filipino, aglalo kadagiti padatayo a naggapu iti Ilokandia.

Napaaytayo man kadagiti dadduma a gunglo a nakipagbangonan gapu iti nadumaduma a rason a saanda a nakapaglayag iti nawatwatiwat a taaw. Ti adatna no dadduma, adda dagiti gundaway a gundawayannaka ti sabali ket agparang a sika ti dakes ket isu ti pudno. Ngem iti sabali a bangir, makapabang-ar ti rikna no kadagiti dadduma ket makita ida a naaktibo kas iti Annak Ti Sinait iti Hawaii, Antonio Ipalari, presidente; Sinait National High School Alumni Association of Hawaii, Davelyn Ancheta Quijano, presidente; Vigan Association of Hawaii, Tessie Aganon; Gumil Oahu, Sandy Lasquero, presidente, kdpy.

Angayen ita a Pebrero 7, 2012 ti kada dua a tawen nga eleksion. Sagudayen ti paglintegan ti ISAH mainaig iti eleksion, nasken a ti maysa a nominee wenno agpapili iti puestona ken aktibo a kameng iti unit organizations a kameng iti ISAH. Nasken a nabayadan ti unit organization ti annual membership due iti tesoreria. Saan nga ad-adu ngem lima a delegado ti aggapu iti unit organization iti pannakaangay ti eleksion. Masapul a presente ti nominee tapno maidatag iti election committee.

Mabalin dagiti situtugaw ti agpailayon iti isu met la a puesto no isu ti kayatda. Kas iti nabaliwan a paglintegan ti eleksion, makapagpailayon dagitoy a situtugaw ken agserbida iti saan nga ad-adu ngem sangapulo a tawen, ngem nasken nga aglasatda iti kada eleksion iti tunggal dua a tawen.

Dagiti agdama nga opisial ti Ilocos Surian Association of Hawaii: Danny Villaruz, presidente; Maria Etrata, umuna a bise; Estrella Pada Taong, maikadua a bise; Loida Alimboyoguen Yamamoto, recording secretary;
Davelyn Ancheta Quijano, Corresponding secretary; Rose Sabangan, tesorera; Lina Mercado, katulongan a tesorera; Lynne Gutierrez, auditor; Alice Castaneda, katulongan nga auditor; Bernadette Fajardo. Antonio Ipalari, PRO

Sarhento de armas da: Art Abinsay, Philip Alcain, Cesar Fajardo, Al Sabangan, Paul Taong

Mamagbaga da: Felipe P. Abinsay, Jr., Ben Cabreros, Romy Cachola, Pio Enrico, Louie Funtanilla, Ted Saribay, Charlie Y. Sonido, MD, Carlito Soria, Ignacio Torres, MD, Amado I. Yoro

Dadduma a proyekto ti ISAH: Mrs. Ilocos Surian contest Nancy Clemente Luat, Helena P, Davelyn Quijano.

Partisipasion iti Filipino Centennial Celebration 2006; Filipino Fiesta Parade idi May 10, 2008; Float Committee a nangiladawan kadagiti immuna a First 15 Filipino Sakada : Elias Yoro - Sinait; Philip Alcain - Vigan; Ruben Gutierrez - Magsingal; Louie Funtanilla - Narvacan; Mel Calpito - Cabugao; Al Sabangan - Cabugao; Danilo Basconcillo - Santa; Dr. Perfecto Vera Cruz - San Juan Lapog; Elpidio Antolin -San Juan Lapog; Amado Yoro- Sinait; Art Abinsay – Vigan.

Saan a paudi ti ISAH a mangyusuat wenno tumulong kadagiti fundraising drive nga agpaay kadagiti biktima ti kalamidad pakaibilangan ti Typhoon Feria, Filipino Community Center, OFCC/UFCH Community Forum, Minority Organ Tissue Transplant & Education Program [MOTTEP], programa ti Institute of Human Services [IHS] iti feeding the homeless, Adopt a Hwy, Hawaii Food Bank, dadduma.

Kangrunaan ti Medical Mission nanipud tunggal Disiembre 2005, 2007, 2009 ken 2011 kadagiti nadumaduma nga ili iti Ilocos Sur ken Ilocos Norte.

Adda Ilocos Sur Idol; GILAS, pannakasangaili da hosting Senador Jinggoy Estrada ken SPM Zuriel Zaragoza idi Mayo 22, 2008 – Empress; Green Revolution Contest, Best Decorated house iti paskua.

Tema wenno slogan ti ISAH: “Working Together to Rebuild our Communities Here and Our Homeland”

Dagiti nagpresidente: Peter Aduja, John Quiocho, Mario Albalos, Dr. Sid Villafuerte, Peping Billena, Rey Custodio, Ben Cabreros, Julio Quiocho, Jr.

Kaudian ken kabaruanan a proyekto ti ISAH ti pannakabuangay ti “The President Elpidio Quirino Humanitarian Award” a mangbigbig kadagiti kameng ti ISAH ket dagiti dua a kangrunaan nga awardees da Dr. Charlie Yadao Sonido ken dati a representante Jun Abinsay a napadayawan idi Agosto 27, 2011. Kas ninamnama, balligi ti imbunga dayta a proyekto ket manamnama a maaramid daytoy a regular a proyekto ti ISAH.

Adu ti annak ti Ilocos Sur iti agnaeden iti Hawaii ket adda dagiti naballigi iti nadumaduma a tay-ak a pakairamanan iti edukasion, ekonomia, gobierno, politika, siensia, medisina, literatura ken kultura, publikasion, warnakan, negosio, radio, media, sports, ken adu pay.

Kodus to ISAH. Ituloymo ti aglayag !