DAGITI DUDON KEN ARABAS ITI KABAKIRAN KEN TANTANAP ITI SANTA NARCISA

DAGITI DUDON KEN ARABAS ITI KABARIKARAN KEN TANTANAP ITI SANTA NARCISA


DISIEMBRE 8, 2009


Dagiti dudon a mangpugipog kadagiti raep ken mula
iti talon ken kabakiran, aduda
a mangkaan kadagiti punnuot agraman ramut
dagiti mula ti nangyuna iti kabakiran

kunada siguro a nakapanawen ti agmulmula
ken ti agbambantay, isu a nalaus ti gagar
dagiti rapas a ngipenda a mangpugipog
dagiti nagsantakan ti pakasaritaan

kunada siguro nga awanen ti apo lakay
a nakaigpil iti tangguyob iti katengngaan ti tanap
nga awan sardayna nga agmulmula kadagiti
adu a pagapitan ti bin-i ken nabun-as a similia

nakalinia dagiti pangen ti dudon a salagasag
ti bitukada a kasta unay a sileng
ammoda met ti agarab iti uggot, uray puon
ken punnuot ngem dida ammo ti kaipapanan
ti kankanenda a bulong, uggot rangaw wenno ramut

aduda iti pagaraban, ngem kawaw ti uloda
dagiti limmampa a matada
arog pay dagiti dadduma ta saanda amin
a taga away ti Santa Narcisa.

kayatdan a pugipogen ti marka ti pakasaritaan ti tanap
ken daytoy a bakir a namungayan dagiti pulikkaaw
ken palabras [wenno arasaas] ti panawen dagiti panagbangon
ken panagmumula kadagiti natukantukad a kinelleng
kas iti murumor a pagay, wenno palakay a tarong
a naisaganaan iti pakalatkat dagiti kattungbol a saringit
a nagim-imasanda nga inigup ti diro ti uyokan
iti nagtagisam-it a patiray-ok ken pakamakam
a pammadayaw.

iddependa ti kunada ti simged a beggang ken rayray
ti puor a pinarnuay ti atong kas ti temtem dagiti mabangonan
iti nalamiis a parbangon, iti tibong ti armas ni saraan
a nangarado ti isek a nakaiwarisan ti irik ti namnama

kunada pay ketdin nga awanen da angkuan ken poldo
a nangimuntar ti batonlagip ti saraan
dayta sidiran ti sagat iti sagpat ti talon
dagiti aggiinum iti sardam ken malem

padasenda ti mangkutkot ti ubbog
iti tikag a barukong dagiti nakatungnganga
a pasurot a dudon, ngem ania ti makunnotda aya,
iti tangkig a sinilong a pagkalianda iti gamayenda
a pitak a maaramid a pagsarban dagiti kunada
a mawaw, ket nakarkaro met a kawaw
ti natikagan a tanap, ti ungot ken sareb
ti bangkira ti kinapalangguad

maarab man amin a bulong, sanga, uggot ken rangaw
ngem ti pakasaritaan ti Santa Narcisa ken saanen
a mabaliwan a maisurat.
Naisurat idin, kas iti laapida nga igpil ni Moses
iti Sinai; maymaysa ti Moses.
Maymaysa ti sang-atan ti Sinai
agtayab man dagiti dudon ngem ti bitukada
agsalagasag iti kinnanda

kas ken ni arabas, nga agkaradap iti man kapitakan
wenno kabingkolan, bugawento latta dagiti
mangisakit iti pinagayan ken kabakiran
ket ti tibong ti bakkuko ni saraan
agallangog iti let-ang iti kabakiran ken katanapan
ti Santa Narcisa.


[Naisurat ita a Dis 11, 2009 kalpasan ti maysa a samiweng kabayatan a tartaripatuek ti banana patchko iti likud ti balay. Nagyakarak ngamin iti sumagmamano a sulbod ti saba, ken nagmulaak iti siit ken kamoteng lanut]