BANNAWAG DIAMOND TREE IKUB KONSULADA HENERAL SABADO
Nakitak manen ti banyan iti arubayan
Konsulada Heneral ita nga aldaw ti Sabado
Nobiembre 7, 2009
Apagisun a dua a bulan daydi
historikal a petsa Setiembre 7 a panagmula
kameng ken opisial ti Gumil Oahu
ken Gumil Filipinas
Nagluniten ti daga; nadalepdepen iti sirok-lawlaw
punona ti Banyan tree a naimula
simbolo ti biag ken pannakigasanggasat
iti ganggannaet a daga
pakalaglagipan ti diamond jubilee
ti Bannawag, biblia ni Ilokano ken iti Kailokuan
nabuldagen ti berde a bulong
iti sanga, iti rangaw
iti itatan-aw makita bun-as
bulbulong a no labsen naisemda
a kumablaaw ken pumayapay
iti silnag ti init, ti rayray ti aldaw
kasla kunkuna ti Banyan: dumakkelak met
a kas iti mangga ken narra
ikarigatak a gaw-aten ti langit
sarabuek ti linnaaw, agkak ti tudo
uray dagiti arbis a babasit ken tarakitik
iti panagtinnag iti daga
adtoy a mangibandera nagan
ti Literatura Ilokana
adukayo a nakaiggem iti pluma ti ayat
ti pluma ti panagserbi, pluma iti kustomre
ti pluma a sibibiag a tradision
agadukayo met koma ta kitaendakto
iti sabali pay a dekada,,,,wenno siglo
ti ayat ken kultura
Subscribe to:
Post Comments (Atom)
No comments:
Post a Comment