ADDA KARARUA TI DANIW

ADDA KARARUA TI DANIW*

Amado I. Yoro

ket adtoy ti biagko
dagiti binatog ti daniw
isuda a masarakak
dagiti agtedted a lua
ti plumak
ket tunggal daniw
yuritko latta a siak
iti kararuak
ta saan a matay ti essem
ininaw-impasngay
ti Sta Romana
dagiti pateg-iliw
iti ipapanaw-isasarungkar
uray dagiti panagbirok
'ti siping sibibiag latta
ti kalikagum:
panaglupos-dur-as
ti mungay-balligi -
adtoy ti kararuak
iti awis-iliw
ket subliak a denggen
tarakitik ti tudo ken
arbis-ling-et ti rabii
iti Tapao ken Pikkan.
Imdengak ti dayyeng
ti maysa a suli
ti kalapaw
ti ranitrit ti langkapi
ken tinidtid
binay-osan a kawayan;
ket uray ania ti panawen
ken dissio siak daytoy
agtantanamitim
a pluma da Lam-ang
ken Bucaneg
siaammal balitok
ti berso ken dallang:
dinto pulos matay !

*Bannawag Mayo 30, 1988