TI SALMO, TI AYAT KEN TI PUSO TI PLUMA

DANIW:
TI SALMO TI AYAT KEN TI PUSO TI PLUMA



AMADO I. YORO
Ewa, Hawaii
12/8/07


kansionanta ti apas
ket ti langit aggarakgak
a mangyaw-awan ti bisin
maalep-ep ti apuy dagiti agpalakpak
a karayan ; malmes ti buteng
ket umisem ti bulan, makeltay ti damsak
ti init patibkerenna ti biag
iti panagibtur

nasudi latta ti kanta iti bullallayaw
agallin ti bato; mabangon ti templo
ket ti samiweng
maallingag manen
a maibuyog iti dayyeng ti pul-oy

timudem met ti nakurapay
ngem naimpusuan a kansionko
kadagiti tarakitik ti tudo
a kayatmo a tukmaan.

Riknaem ti anem-em ‘toy ayat
Dagiti mayurit a daniw
Toy nagtagipuso a pluma
Nasudsudi pay a denggen
Ti salmo ti kappia
A nangyaw-awan ti apas
Ken panagduadua.