PANAGSUBLI: DUA A TALDIAP

PANAGSUBLI: Taldiap Uno


Amado I. Yoro

[Ket taliawek ita
Tugot
Ramut
Dapan
ti ubing
a tumaytayab
kas iti sallapingaw
agampayagda
met a kas iti tuwato
iti law-ang
ti init
a sumsumged.]


Dayta kinaagtutubo
Nga isem
Dagiti kasingin ti sutil
Wenno sariwawek sirmata
Ti panagbaniaga
Iti isu met la nga init
Riniwriw a darepdep
Nailaga met latta ti dismaya
Wenno karit
A mangsuba ti allon
Dagiti kumalatkat
A sirmata
A balangat ti balligi
Adtoy: taliawek ti puon
Dagiti ipapanaw ti inkur-it
A binatog
Iti ungto ti panagbirok
Ti ramutko
Ti kinasudi a saan nga aglumen
Daydi indayon
Ken duayya
Umayakto manen
Iti sabali a pannakainaw-pannakasikog
Iti maysa a pannakaipasngay!


Bannawag Marso 15, 2004 panid 14



=====00000======

PANAGSUBLI: Taldiap Dos

Panagsubli itoy a dagidagi

Nabirokak man ken saan ti kinaasinok
ungto ti panagbirok ken panagtawataw
Adtoy: subliak ti ramutko iti kinasudi a
saan nga aglumen daydi indayon ken
dagidagi ti duayya ken panagkansion
ti tudo ken dagiti sabong.
Adtoyak ita iti sabali a
pannakainaw-pannakasikog
Iti sabali a pannakaipasngay!

Nagkupas kadi ti tugot
Naugotan kadi ti ramut
Ti ammok, magna latta daytoy a dapan
Iti sabali a panagubing ken kinaagtutubo
Dagiti agkabannuag a panagem

Subliak a sirayen ti tumaytayab
Ngatuen ti Pikkan kas iti sallapingaw
agampayagda latta uray dagiti tuwato
iti law-ang ti init a sumsumged.

Dayta kinaagtutubo nga isem
Dagiti kasingin ti sutil
Wenno sariwawek sirmata
Ti panagbaniaga
Iti isu met la nga init
Riniwriw a darepdep
Nailaga met latta ti karit
A mangsuba ti allon
Dagiti kumalatkat a sirmata
A balangat ti balligi
Adtoy: taliawek ti puon
Dagiti ipapanaw ti inkur-it a binatog
Ket dinto met latta magawidan
Ti segga ti malem
Iti ungto ti panagbirok

Daytoy ti indayon
Ken duayya ti ipapanaw
No agkidemen ti rabii.