KARAMBOLA KPRP SUNDAY MAY 4, 2014

Karambola KPRP Dear Tita Fely, Nakapagsuratak met iti napintas a programam. Naguyugoyak met ita a mangibingay kenka, ken para kadagiti agdengdengngeg ti maysa a pasamak ti biagko, ken dumakdakkel a a parikutko iti agdama. ======================== Addan pamiliak. Sumagmamano a tawenen nga ipagarupko a nasimbeng ti biagko. Ngem kasla dimteng a pannubok ken allawig idi napalabas a tawen a nagkuros manen ti dalanmi ken ni Salvacion Alegre iti Lanai City a nagatendarak ti maysa a komperensia. ======================= SIGUD a kaayan-ayatko ni Salvacion, saan a pudno a nagan. Kolehiokami pay la idi idiay Northwestern College, Laoag City. Nagturpos iti Home Economics, Banking and Finance kaniak. Nagkasarkami iti nalimed tapno saan a lapped ti panagpa-Hawaiiko idi inordernak dagiti nagannak kaniak. Inlimedmi ti inaramidmi ta ammok a didak kayat ti pamilia ni Salvacion. Dakkel ti awang ti nagbaetan ti pamiliami. Adda mabalbalinda. Ngem sakbay a nagpakadaak, nauramkami iti gumaygayebgeb a kinarugso ti riknami. Banag a nagawidan a nagpapaskami iti alimpatok ti kinaimnas ti dua. ====================== Addaakon iti Hawaii ket insidawsidawko ti nangala ti Business Management ken Public Administration ta adda nasiripko a pakasapulak iti kastoy kualipikasion. Adu ti posibilidad ti promotion ditoy no adda ti eligibilitym. Insagipik pay ti nangala iti Real Estate ken labor Laws. Kas agdama a Financial Officer iti maysa a nalatak a banko ditoy kompania a yanko ita, dakkel a bentahek no maadalko dagitoy a linia ti adal. ====================== Nabayag a saankami a nakapagsinsinnurat ken ni Salvacion kabayatan ti kaaddak iti Hawaii. Idi nadamagko laengen a nagkasardan ken ni Roberto, nasinged a gayyemko, ken kameng iti US Marine Corps lima a tawenen ti napalabas. Diak kinagura ni Salvacion. Ammok a diak maited kasapulanna nga imbunga iti nawatiwat a panaginnaddayo. =========================== Nupay nasaktanak met, inakok ti amin. Nailiwliwagko dayta a napasamak idi naam-ammok ni Maritess. Kas kaniak, natalged metten ti trabahona iti Real Estate. Ket nagkallaysakami. ============== "Sika dayta Villamor?" dinamagna. "Sika dayta Salvacion?" imbalesko. "Ania ti kaaddam ditoy Lanai?" dinamagna pay. "Ket sika ngarud, ania met nga addaka ditoy?" ======================= Kinitak ni Salvacion. Pimmintas ti panagkitak kenkuana. Saan a nagbaliw ti kinasimplena. Atiddog pay laeng daydi buok a nangkayaw ken nakatnagak unay. Beltak ken naurnos latta. Nariknak ti panagtigerger ti riknak. Kunak kadi a sabsabali? Kunak kadi a nalaus nga iliw? ===================== "Surprise Villamor?" makaali ti isemna. =================== "Awisenka no adda wayam" ==================== Kasla nakalamlamuyot a musika ti awisna. ==================== Tapno dina ibaga a takrotak wenno nagbaliwakon, napankami iti pagbaran iti otel. Adda dancing floor ti pagbaran. Iti sagpaminsan a simsim iti nalag-an a raman ti seven-seven, red wine met ken ni Salvacion, pasaray agdanggaykami nga agsala. Adu dagiti napagsarsaritaanmi. =================== Kunak pay ketdin nga addaak iti Top of the Eye ken ni Maritess ======================= Naammuak a nabayagen a nagdiborsioda ken ni Roberto. Saan kano met a naragsak iti sidong ni Romualdo, ti agdama a lakayna. Saan kano a makaputot daytoy ta pinellasda ti ukelna. Il-iliwenna kano met ti maaddaan iti anak ngem natayen ti namnamamana ken ni Romualdo, isu a nagsinada. Ket ditoy met Lanai a nakaigasat iti puestona a Hospitality and Catering manager iti hotel. ============= Adalemen ti rabii. Adun ti nainummi. Nadlawkon ti ingel ti arak. Ket tunggal agrisiris dagiti takiagmi, mariknak ti kasla uram a bumangbangon iti nagbaetanmi. Agkedkedak koma idi yawisna a mapankami iti apartmentna ngem kas iti sigud a panagduyosko iti pakatnagak a nalamuyot ken atiddog a buokna, ad-adda manen iti nakaisigudak a banglona idi addakami idiay Ilocos. ============== Bigaten idi makapuotak. Inawagak ni Maritess iti long distance. Imbagak nga agpasiarak pay saakto agawid. Inulbodkon ti asawak. ================= “Dika agbaybayagen ket adda gurigor ni |Alona,” kinunana. Ti tagibimi ti kayat a sawen ni Maritess. =================== “No malem, addaakton,” imbabakon ti telepono. =================== Alas kuatron ti malem idi tumayab ti inter-island flight. Ita la a mariknak ti bannogko a nagpasiar a kaduak ni Salvacion. Iridepko koma ngem isu metten a matannawagak ti pakabuklan ti Oahu, dayta ti wangawangan ti Diamond Head, sa ti Waikiki Beach, natangkaran metten dagiti agdidinnaeg a pasdek iti saklot ti Waikiki. Immangesak iti nauneg. Madamdama, nakababakamin iti andamio. =================== Dua a karton dagiti kargak a naglaon iti kappuros a pinia nga immay indanon dagiti kakabagiak iti otel. Adda pay sumagmamano a nateng ken lames, kuros, padaw ken pukpuklo. Imbag manen ta adda sarabuen ni Maritess. ================ Nagtarusak a dinapadap ni Alona. Naanem-em nga agpayso. =================== “Idi pay la rabii a segseggaandaka, Honey,” kinuna ni Maritess. ================== “Diak nakamakam ti last flight,” inlibakko. “Diak metten nakaawag ta naggudtaimkami kadagiti gagayyemko sadiay.” ============== “Not bad. Ngem no sabali a gudtaim, agreklamoak.” ===== “I think I’ll be going back there soon,” sinintirko ni baket. ====== “Why?” ==== “I have a good prospect for investment in the island of Lanai.” ==== “Condo ba? A lot or a ranch?” ==== “Di met kayatmo ti lote? Let’s say a real estate investment. A possibility a big development overlooking the ocean of the Pineapple island…” ==== “It could be nice!, kinuna ni baket. ==== NAGBALIW TI AGUS TI BIAGKO. Tita Fely, Masansan nga agsarakkami ken ni Salvacion. Langitna met ti kaaddak iti dennana. Iti labes iti panangkuskusitko ken ni baket, adun ti napasamak iti biagmi ken ni Salvacion. ========= “Mapaspasamaken iti biagta, Villamor. Ket patiem kadi nga agrusing ti maysa nga ayat iti sabali a similia?” ==== “Burburtiaannak sa, Salvacion” ===== “Nga adda latta agbiag a parsiak iti ruar ti kallaysa…sabagay…” === “Ania ti kayatmo a sawen, Salvacion” ==== “Ay-ayatennak kadi met laeng?” ====== Natikawak. “Ken kasano kapudot ti init a di magaw-at ken ti pudot ti apuy iti dennam?” ======== “Lawlawagem ti saom, Salvacion” ============ “Sakripisio ti ayatko, Villamor. Madadaanak manen a mangidiborsio ken ni Romualdo no isu ti nasken.” =========== “Ngem addan asawak ken anakmi.” Panangiliklikko. ============ “Saan a tubeng kaniak dayta. Maawatak. Kukuaka no addaka iti dennak. Makaanayen dayta. Sabagay, asawanak met idiay Laoag idi. Ken panggepko ti aglusulos iti trabahok ditoy, ket padasek ti agbirok ti trabahok idiay Honolulu.” ============ “Ania?” naklaatak. ============= “Agpayso, tapno as-asidegak kenka. Addan bunga ti aramidta!” =========== “Salvacion!” ============ “Natungpalen ti arapaapko, Villamor” ============= PROBLEMAKON no kasano nga adaywak ni Salvacion, Tita Fely. Sinsinterennak metten ni Maritess. Nagbaliwak kanon. Diak pay ketdi maasikaso a nalaing ti ubingmi. ========== Assideg met nga awagannak ni Salvacion iti trabahok. Dandani kanon agpasngay. Madandanaganak no birokennak ketdi ditoy balay ket ni Maritess ketdi ti makasungbat iti telepono. ========== Agsangsangit a nasangpetak ni Maritess iti dayta a malem. Agkak koma ti ubingmi ngem inggigirna. Nasaktan ti riknak. ==== “Saanka man nga apampammarang, Vilamor. Aginsasantoka met gayam,” kinuna ni Maritess iti baet ti saibbekna. “Saannakami gayam a patpatgen nga agina.” ===== Ammok a natakuatanen ti palimedko. ====== “Pakawanennak Maritess. Diak naliklikan ti awag ti lasag. Ngem ammuem koma a kiniddaw ti gasat ti kastoy a napasamak. Dawat ni Salvacion amin dagitoy.” ====== “Dawdawaten kadi ti anak? Kasla kadi lattan bukel nga idisso iti rengngat ti daga tapno agtubo?” ====== “Maawatannak koma, Maritess Ket maawatam koma met ni Salvacion,” impakaasik. “Sibibiag a pakalaglagipan ti kiniddaw ni Salvacion. Saan ngamin a naited ni Roberto ti arapaapna a maaddaan iti anak, kasta met nga awan ti namnamana ken ni Romualdo. Agasawakami met ken ni Salvacion iti nalimed sakbay nga immayak ditoy. ====== “Apay a sika pay, litsem. Ulbod. Rawet!” Nagbales ti imana iti rupak. Nagwagtewagteng. ====== “Diak ammo ta siak pay ti inurayna,” nababa ti timekko. ===== “Bastardokayo amin". "Get out of my sight, gaddem you". "Agpilika Villamor, Dayta a Salvacionmo wenno dakami nga agina". "Answer me! Sagad! "I will take Alona with me and go back to the Philippines---and take your name OUT from ours" You have no child from!" She is all MINE and MINE ALONE......". Kaslaak natupakan ti sangariwriw a bomba a nangparmek ti Nagasaki, Japan dagita a balikas ni Maritess. Daytan ti kadagsenan a parikutko Tita Fely. Napategda amin kaniak. Kastan =====================Villamor Salvadores. Makaha” " " Reply, Reply All or Forward | More