MAYO 10, 2014 FILIPINO FIESTA: ISANG PUSO, ISANG DIWA

MAYO 10, 2014-----SABADO-------FILIPINO FIESTA 2014 Isang Puso, Isang Diwa [Maysa a puso, Maysa a Sao] ============ Amado I. Yoro Mayo 10, 2014 ============= Apagisu nga agtengnga ti aldaw ita a Mayo 10, 2014 Sabado idi dumtengak iti Honolulu Municipal Ground a pakaangayan ti maika-22 a tawen ti maang-angay a Filipino Fiesta. Tinawen a marambakan daytoy kas paseten ti napateg a kaipapanan ti pannakaipakita ti maysa a parambak nga inrugi ti Filipino Community Center. =================== Dayta a piesta ti nangrugian ti panagyaman ken pannakaibunannag ti nalaus a panagayat dagiti kadaraan ken dagiti saan a kadaraan ti pannakaipabuya dagiti nadumaduma a kita ti salsala, kultural ken dagiti kannawidan a Filipino. Maysa daytoy a pamataudan ti pondo ti FilComCenter. Maysa a wagas ti pannakaapresiar kadagiti adu nga sponsor ken boluntario a tattao. ======================= Sakbay nga immayak ditoy, dimmagasak pay laeng iti simbaan ta adda nobena para iti Hermana Mayor ken ti Resurrecion. Maysa ni Gloria ti partisipante iti Hermana Mayor. =============== Iti sango ti Hawaii State Capitol, nalawlaw ti estatua ni Santo Damien kadagiti adu nga agrukbab kenkuana. Ni dati a Father Damien, Belgiano a misionario ti nangbusbos ti biagna ken serbisiona kadagiti ginasut a pasiente ti kukutel [leprosy] iti Kaulapapa Settlement iti Molokai kadagidi a panawen. Babaen iti Santo Papa iti Batikano, napagbalin a santo ni Fr. Damien. =============== Iti Honolulu Municipal Ground, iti sirok ti dakkel a tolda, madama ti panagtokar dagiti kameng ti Banda Kawayan. Amin nga instrumentoda ket bin-ig a kawayan. Nagduduma ti aweng, tibong, killiing ken kalattit dagitoy a kawayan a pagtokaranda. ================= Tema ti piesta ita a 2014: Isang Puso, Isang Diwa: One Heart, One Spirit, Maysa a Puso, Maysa a Sao. ================== Iti tolda ti KNDI Radio, nagsangpetak a kinadinnakulap da Gerry Malabed, Jr., isu ti kabarbaro nga akinkukua ken General Manager ti KNDI Radio. Adda met ni Mel Gonzales a Mr. Sari Sari, sigud nga am-ammok ni Mel iti napalabasen a 40 a tawen ta kaduami idi iti Gumil Hawaii kadagiti panagsuratan ken panagpabuya ti drama, sarsuela ken bukanegan idi katengngaan ti 70’s aginggana iti arinunos ti 2001. =============== Adu ti napagsasaritaanmi pakairamanan iti politika ken ti masungad nga eleksion. Tallo a kadaraan ti agtaray iti Umuna a US Congressional district: dua a senador ken maysa a konsehal. Kuna ni Mel: mapan iti General Election intono Nobiembre daytoy babai. Kunak met: No laeng aglusulos itan ti kaubingan a lalaki, mabalin, ngem no mapanda amin iti eleksion primaria intono Agosto, uray kasano ti ayattayo kas kadaraanda, awan kadakuada ti lumtaw no di ket maysa a saan a kadaraan. ============== Adda met dagiti politiko a kuyogkuyogen dagiti kadaraan nga agparparang a liderda.[naganek dagitoy ti sao sao] wenno pannakangiwat, pannakamata, guide. ============== Adda da Mayor ken Gobernador, adda pay senador, ken dagiti dadduma a kandidato. ================ Adda dagiti lumabas a kasla saandaka a makita, ngem ti dayawenmi idi nagsardeng ken kimmablaaw ni Senate President Donna Mercado Kim a kuyogkuyog da Jake Manegdeg. ================= Dimmakulap met ni Roland Casamina ti nairut ket ti pagarupmi, adda met yasidegna a kandidato. ============ Adda tent dagiti nadumaduma a a negosio ken organisasion. Adu a kita ti makmakan, sinam-it; saramsam, ken luto Filipino. ================= [Maysa a kapaliiwan uray sigud nga am-ammo, mangliklik ken saandaka a nakita.] Aduda ti kasta iti komunidad. Ammodaka iti maysa nga aldaw a kasapulandaka, aglalo iti kampania politikal, no bigat kasangaldaw, aysus, ne ay ne oy------- ====================== Paset ti programa nga insagana ti Fiesta Committee ti Santacruzan ti inturong ti OFCC nga ipanguluan da Jean Jeremiah, Baybee Ablan ken Loida Yamamoto, nasurok a 30 dagiti reyna itoy a Flores de Mayo. ======================