denggem, ala, denggem pay ti kanta-daniw

Denggem, ala, denggem pay ti kanta-daniw 12/02/2003 Ressurrecta2 Daytoy ti daniw para kenka Ti daniw ti sabali a putar (dimon sa la ngamin marikna ti segga ken iliw ti ur-urayek a binatogmo a nabayagen a diak nabasa ken nangeg) Seggaak a seggaan ti birtud ti init Kadagiti agsapa uray agmatuondan (Kayatko ti agbiag iti lagip uray iti Ipupusay ti malem dagiti sikikidem A mata ti ayat ken arapaap) Toy kanta para kenka met laeng Ta ikkak ti biag ti kalman nga agsubli Denggem, ala, denggem man pay Ti samiweng Ti harmonika Ti napalabas Ti agdama - ti kari - ti ayat - (uray ti pasidumri wenno pasugnod) Nabirbirtud ti ti pul-oy a dumnges Ngamin ti musika nailaga ti kappia Ti raya ti init. Perngek ita met laeng ti isem Ti init, kas iti arbis Maidasayakto manen iti maysa a darikmat Iti ungto ti pluma Kas iti kansion Ti daniw Ti puso ti ayat Ti epiko a maisurat Adda biag toy kanta-daniw. Ti birtud ti init: namnama Ti birtud ti ayat: talna ken sirmata.