Sakada Sentenario 2006

Sakada Iti Sentenario MaikaSangagasut a Tawen Selebrasion Amado I. Yoro, Commissioner Chairman, Media, Publicity and Communications Committee Filipino Centennial Celebration Commission [Act 159] [Naangay ti selebrasion las-ud ti makatawen 2006] 15 a komisioner ti kameng ti FCCC manipud 2002-2006 Sakada, Lugayandaka, Saludo ken panagraem Uyosenka iti imeng ti kamalig Dagiti lagip iti napalabas ket Isu met la a saursar wenno agamang Ditoy man nga ipaduyakyakmi Naindayawan a panagrukbab Dagiti naglasatanyo a dalan Isuda dagiti desdes a sinurot Ti henerasion ken kaputotan a simmurot. Iti nalawlawag a taldiap Kas iti agbukar nga agsapa Makitaka iti rawis Ti panawen a pinasangbay dagiti Panagibtur dagiti man saniit ti init, Dagiti bayakabak ti tudo Ket dagiti kinatudio, kinaandur ken kinaanus A tinenneb ti adu a kayaw ken regta Yaskawmo manen ala dagita saka Wen yaddangmo, magnaka, magnaka Kas iti kayumanggi a gurong ta maysa nga adding Ti kaibatogan ti balligi nga insupapak ti pannakapaay Magnalka ket ituloymo a gun-oden ti sabali a balligi. Sabali a balligi ken pannakigasanggasat A saan a nasarakan iti panagtakuat iti nalabaga a daga Nga inuram ti puor ti apuy ti gil-ayad ni Diosa Pele Dagiti atab ken ugot ti baybay, ti pungtot ti lava a daga Ti taaw ken karayan kas iti urat dagiti adu panagbirok Iti tumrem a ling-et mugging nga agdalapdap iti takiag Iti dakulap kas iti sitatanggaya nga ima Manggaw-at ti balangat wenno korona Dagiti tinegged a pammadayaw iti riniwriw Nga adding iti sab-ok ti talon ken iti pagunasan Ken dagiti panagbaniaga iti sangasiglo A panagsukimat iti rimat Kadagiti riniwriw a panagbitek ti pagorasan a pannakigasanggasat Taliawem, wen, taliawem ti maysa a ladawan ti naggappuam Ti ramut nga inut-inut a a nagkarayam a simmagepsep Iti sirok ti daga; timmuboda a kas nakidser a pondasion Ti pakasaritaam, sika a punnuot, sika a munmon, sika a muhon Ti amin a panagbaniaga ken panagsagana iti adayo a masakbayan…. Tumakderka, wen ala, tumakderka: maysa a kayumanggi Puli a pinatanor ti Perlas Ti Taaw ti Daya Dagiti dalluyon nga aggtignay a kasinnurot ti panawen Ti dawel, ti didigra, ti aluyo, ti atab, ti ugot Denggem, denggem, dagiti samiweng iti rawis ti angina Ti tudo, ti arbis, ti bayakabak, iti rawis ti bullalayaw Agisem nga agsapa iti linak, iti agsapa ti ibabangon Kantaan latta dagiti tumaytayab, dagiti sallapingaw Ket dagiti paris ti pagaw, umay manen ti romansa Ti sonata a mangipasimudaag ti sam-it Dagiti puyupoy ken payapay ti kappia Iti nakaparsuaan ken sudi a mainaw a darepdep Kitaem: dagiti isisigngising ti rinibu nga arapaap Matubayda iti regta, iti ganaygay ti rikna Ken panagem amangragpat tampok ti agmatuon Ti init a rumayrayray; parmekenna ti ulep Ket dagiti rayusigaw-atna a yasideg Dagiti nasudi a namnama uray kadagiti umas-asideg A panagligsay ken umay dagiti malem A panagisem ti sardam ngem nalawag latta ti silaw Ket mayallatiwda iti maysa a rabii ken Maysa nga agsapa iti ibabangon…. Ti askawmo idi kalman, idur-asna latta ti sabali Nga adding no umay manen ti sabali a bigat Iti sabali a panagbaniaga ken panagsangal: Ti biag nga agallawat kadagiti matda a kaputotan Wen, ti kaputotan ti magenne-genned a henerasion Kas iti pannakayallatiw a kaputotan ni Adam Ni Abraham, ni Noe, ni Moses, ni Kristo Jesus Wen, agbiagka, sakada, ruknoyanka, adtoy ti sangasiglo A katkatawa, a ray-aw, a a piesta Iti amin a panagkallautang arigmo ti tawataw a Hudio Ta sika met ti Tawataw ken Balliodong a kayumanggi Tampokka iti 2006 a napnuan kaipapanan Dagiti naglasatam a dalan nga inasak ti kayumanggi a gurong A rinegregam tinukel ti ling-et ti namnama, rinegregam ti ling-et Ti ayat, naitukitda ii nadam-eg a barukong ti nalabaga a daga Ti agtultuloy a panagbiahe nga agdaliasat iti panagbirok Ti kaibatogan a langit dagiti biag a mainaw ken maipasngay…… Wen, Sakada, magnaka pay laeng, magnaka iti baet dagiti puli Kapadam ida met nga immay a ganggannaet iti maikadua a taeng Nga agtakuat met iti kaibatogan, agdakiwas, agdur-as Mapaay wenno agballigi nga agramut iti sabali a taeng Ngem iti panagramutmo, rimmusing ti adu a bukel ti namnama Iti nadam-eg a daga a napnuan iti isem ken namnama Kadagiti tinallikudanda nga ulila a dulang-Kailokuan Sakada: maysa a pakasaritaan ti gurong ken takiag Sirib ken sirmata, maysa a a kinapudno: modelo ken kayaw.