Awan Pilien ti Panagserbi a Boluntario iti Bukod a Komunidad

Awan ti Nataengan wenno Ubing iti Nagan ti Panagserbi a Boluntario====== Awan Nataengan Wenno Ubing Iti Nagan iti Panagserbi a Boluntario Amado I.Yoro Dua a nataenganen a padamin a limmas-ud iti payapay ti pitopulo, ti nagkuna iti nagduma a kapanunotan: --------------------- Umuna: Nataenganakon, awanak ditan, bagiyo metten.--------------- Maikadua: Addaakto latta aginggana ti kabaelak ken ipalubos ti salun-at, bagi ken panunotko iti rummuar ken makidanggay iti agus ti biag. ------------------- Makidanggay. Makipagtunos. Makikaykaysa. Mangted ti panawen. Kasta ti naawatanmi iti kinuna ti maikadua.---------------- Nalpasakon. Panawenyo metten. Didak ibibiangen. Kasta met ti nagawatak iti kinuna ti umuna.------------------ Ania kadagitoy ti pangipuestuantayo ti bagitayo, kalpasan a nakaawattayon ti nangato a pammigbig kas ‘kangrunaan a pammadayaw’. Agsardengtayo kadin? ------------------ Adda sumagmamano nga am-ammomi ti nagkuna: “Adda man ken awan ti plake wenno sertipiko ti pammadayaw, saandak a mapasardeng nga agaramid iti mabalinko nga aramiden a patiek a pakairanudan ti sabali.” ---------------- Iti kaudian a OFCC board meeting itay Marso 30, 2014 iti FilComCenter, kadagupan iti aganay a 38 a lider ken kameng iti komunidad iti pamattapatami, mabalin nga adda 12 wenno apagkatlo kadagitoy iti agtawen iti 69 agpangato, mabalin nga ad-adu ti agtawen iti nagbaetan ti 36-68, mabalin nga 4 wenno 6 ti agtawen iti 18-35. ---------------------- Iti pammatimi, no agkaykaysa ken adda panagtutugmok ti pampanunot dagitoy a mangisakad ti masnop a proyekto, agpapada dagitoy a makatulong a mangpadur-as ti komunidad babaen iti panagtitinnulong ken panagkaykaysa iti maysa wenno ad-adu pay a masnop nga isyu a mangitag-ay ti gandat ken panggep ti OFCC: “to promote and perpetuate the Filipino cultural heritage; to help unite all Filipino organizations for the common welfare of the Filipino community; to encourage all Filipinos to develop a strong sense of responsibility in a greater participation for the betterment of the Filipino community in the island….” ----------------- Sika a mismo nga akimbagi ti mangikeddeng ti kayatmo nga aramiden iti gimongmo. Aramid a boluntario daytoy. No mangtedka ti tiempom, wenno aramidem ti pagrebbengam kas umili. ----------------- Adda nagkuna kadakami no apay nga ad-adu dagiti nataenganen nga agserserbi iti gunglo. Apay kano nga awan ti gundaway dagiti agtutubo wenno ub-ubbing tapno matubayda nga agserbi. ----------------- Pudno man ken saan ti pammaliiw daytoy a kabsat, ti ammomi ket nawaya ti asino man a sumrek ken makitipon. ---------------- Iti OFCC, adda naituding a paset dagiti agtutubo a makipartisipar, maibatay iti bylaws, adda standing committee Task Force on Youth: “to encourage youth to become active and shall coordinate all youth programs….”---------------- Maysa a madlaw no apay nga ad-adu ti ‘nataengan’, ipagarupmi: nawaywayada iti panawenda kalpasan ti panagretiro. Kayatna ti agnanayon a panagsursuro a mangipaneknek a saanda a maudi kadagiti agkabannuag wenno agtutubo—inaldaw nga ibilang dagitoy a nataengan a ti panagadal ket awan ti patinggana. ------------------- Adda pagsasao: no agsardengkan nga agsursuro, kasla met insardengmon ti umaddang. Iti biangmi, kas maysa a sakupen ti 69 agpangato, saan iti kapaut ti biag ti pakarukodan, ti pakarukodan ti maysa a tao ket ti kalidad ti serbisiona iti kagimonganna. --------------------- Itoy a gundaway, saluduanmi dagiti nataengan a padamin nga adda iti 69 agpangato. Daytoy nadakamat a miting ti OFCC, adda da Jake Manegdeg a no tawen ti pagsasaritaan, natenneben, no aktibo ti pagsasaritaan, isu ti maysa kadagiti sumagmamano a lider a makaited pay laeng ti panawenna. Nagpresidente iti UFCH 1976-1977; 1978-1979, nagkomisionado iti dua a Centennial Commission. Ambassador Juan C. Dionisio Lifetime Achievement Awardee-UFCH. Agdama a presidente iti Filipino American Citizens League.---------------- Adda met ni Mrs. Pacita Saludes, isu pay la daydi nasangpetanmi a presidente a nangiturong ti Gumil Hawaii sipud idi 1971. Damo a gunglo a nagkamenganmi. Ni Dr. Ignacio Torres, immuna a presidente ti Filipino Coalition for Solidarity. Agdama a presidente ti Candonians of Hawaii.-------------------- Saluduanmi met dagiti agtutubo, agkabannuag nga adda latta a makapulapol iti community service.------------- Nayon ti paliiwmi, tallo a pasado a presidente ti OFCC ti adda ditoy a miting: Ilalo Parayno, 1976-77; Amado Yoro, 1982; Ben Cabreros, 1997-1999. Saan a gapu ta nalpasdan ti takem, iti nagan ti panagserbi- isu ti panagserbi. --------------------- Maysa pay a pammaliiw: adda dagiti nagsubli manen kalpasan a napaut nga awanda. Maysa a rason a makita, kayatda ti umay agpaliiw, agsubli a makilangen, umayen ti eleksion, ti masaludsod: yanmo kadagiti panawen ti panagtrabaho wenno kunatayo a panaglangoy iti kaadalman a taaw iti nasabrak a bagyo ti biag. --------------------- Adda pagsayaatan ti lumned-tumpaw a kunada. Ngem patienmi a nasaysayaat nga amang ti makuna a ‘taginayon’ wenno masansan. Kas iti aginaldaw a panagsagrap ti taraon iti dulang. Ammom ti mapaspasamak iti uneg ti kosina. Umayka kadi manen gapu ta adda kayatmo. Wenno umay agdillaw. Botos kadi laeng, titulo, puesto. --------------------- Kombension manen ti OFCC ken UFCH iti Hunio ken Hulio. Nawayaka nga umay a makipagserbi, mangabak wenno maabak iti eleksion. Dayta ti kita ti boluntario a panagserbi iti komunidad a salsaluduanmi. Adda man ken awan ti posision iti liderato, iti panagserbi ti nasken nga ipakita iti agkuyog a sao ken aramid.####